O‘zbekistonda 2016 yilning yanvar-dekabr oylarida bozor xizmatlari o‘tgan yilning shu davriga nisbatan 12,5 foizga o‘sdi va xizmatlar hajmi - 90,99 trln. so‘mni tashkil qildi.
Davlat statistika qo‘mitasi axborot xizmatining xabar berishicha, hisobot davrida quyidagi xizmat turlari bo‘yicha yuqori o‘sish sur'atlariga erishildi: moliyaviy xizmatlar - 19,2 foizga; ijara xizmatlari - 17,8 foizga; sog‘liqni saqlash sohasidagi xizmatlar - 16,1 foizga; ko‘chmas mulk bilan bog‘liq xizmatlar - 15,8 foizga; kompyuterlar va maishiy tovarlarni ta'mirlash bo‘yicha xizmatlar - 14,9 foizga; savdo xizmatlari - 14,7 foizga.
Xizmatlar tarkibida eng katta ulush transport xizmatlariga – jami xizmatlarning 29,1 foizi; savdo xizmatlariga – 28,7 foizi; moliyaviy xizmatlarga - 10,8 foizi; aloqa va axborotlashtirish xizmatlariga - 6,7 foizi; ko‘chmas mulk bilan bog‘liq xizmatlarga - 3,7 foizi; ta'lim xizmatlariga - 3,6 foizi to‘g‘ri keladi.
Hududlar kesimida yuqori o‘sish sur'atlarga Jizzax (17,7 foiz), Toshkent (16,7 foiz), Andijon (16,5 foiz), Farg‘ona (16,4 foiz), Qashqadaryo (16,3 foiz), Surxondaryo (16,3 foiz), Namangan (16,0 foiz) viloyatlarida erishildi.
