Маълумки, шу кунларда "2017-2021 йилларда Ўзбекистон Республикасини ривожлантиришнинг бешта устувор йўналишлари бўйича Ҳаракатлар стратегияси" лойиҳасининг жамоатчилик муҳокамасига бағишланган медиаҳафталик бўлиб ўтмоқда. Бугун 24 январь, сешанба куни яна бир устувор йўналиш тақдимоти бўлиб, муҳокамага қўйилди - Қонун устуворлигини таъминлаш ва суд-ҳуқуқ тизимини янада ислоҳ қилишнинг устувор йўналишлари. 

Бугунги йўналиш бўйича тақдимотда давлат органлари вакилларидан - Ўзбекистон Республикаси Адлия вазирининг ўринбосари Нодир Жўраев, Олий Мажлис Сенатининг Қонунчилик ва суд-ҳуқуқ масалалари қўмитаси раиси Ботир Матмуратов, Олий Мажлис Қонунчилик палатаси депутатлари Акмал Бурхонов ва Нодиржон Мухторов, Тошкент давлат юридик университети ректори Есемурат Канязов, Ўзбекистон Адвокатлар палатаси раиси Равшан Аҳмедов, Президент ҳузуридаги Судьяликка номзодларни танлаш ва тавсия қилиш бўйича комиссия вакили Абдуҳамид Комилов, Бош прокуратура Ахборот хизмати раҳбар ўринбосари Умид Муҳаммедов ва Ўзбекистон Республикаси Олий суди судьяси Холмўмин Ёдгоров иштирок этди. 

Мутахассислар ўз соҳалари бўйича 2017-2021 йиллардаги Ҳаракатлар стратегиясига киритилган бир қатор лойиҳалар ҳақида сўз юритишди. Унда суд ҳокимиятининг мустақиллигини таъминлаш, судларни ихтисослаштириш, маъмурий судларни ташкил қилиш масалаларига тўхталиб ўтилди. Янги Ҳаракатлар стратегиясига киритилган лойиҳалардан бири судьяларнинг ҳуқуқий мустақиллиги нуқтаи назаридан уларга нисбатан муддат белгиланишини назарда тутади. Лойиҳага кўра, судьяларга дастлаб 5 йиллик синов муддати белгиланади, кейинги муддат 10 йилликни ўз ичига қамраб олади, ундан кейин эса муддатсиз давр тизими жорий этилади. Таъкидлаш жоизки, муддатсиз тизим тушунчасига 65 ёшгача бўлган давр киради. Ўзбекистон Қонунчилигига кўра, 30 ёшдан ошган мутахассисгина судья лавозимини эгаллаши мумкин.