Қозоғистон пойтахти Остона шаҳридаги Сурия бўйича ҳукумат ва мухолифат делегациялари, Россия, Туркия, Эрон, БМТ бош котибининг Сурия бўйича махсус вакили Стаффан де Мистура иштирокидаги ва АҚШнинг Қозоғистондаги элчиси Жорж Кролнинг кузатувчи сифатидаги музокаралари давом этмоқда.

"Учрашувлар тикланди, иш олиб борилмоқда, - деди де Мистура. – Биз ҳар доимгидек ижобий кайфиятдамиз".

Сурия ҳукумати ва мухолифати сешанба куни де Мистура воситачилигида Суриядаги сулҳни қўллаб-қувватлаш механизмларини муҳокама қилишни давом эттиришади. Иштирокчилар шунингдек ўт очишни тўхтатиш ва Суриядаги можарода иштирок этаётган томонларнинг низони тинч йўл билан ҳал этиш борасидаги кайфиятини ўзида ифодалайдиган ҳужжатни мувофиқлаштиришни якунлаш ниятида.

Аввалига ишни маҳаллий вақт билан 13:00 га қадар якунлаш кўзда тутилганди. Бироқ душанба куни кечқурун музокара иштирокчилари бу муддатга шубҳа билан қарай бошлашди. Музокаралар оғир ва анча кескин руҳда ўтмоқда, Сурияда бир неча йил давом этаётган можаро вақтида кўплаб ҳал этилмаган масалалар ва даъволар тўпланиб қолган. Бироқ учрашувни яна бир кунга чўздириш ҳақида ҳозирча ҳеч ким маълум қилмади.

Музокаралар Остона марказидаги Rixos President Astana меҳмонхонасида ўтказилмоқда. Қатнашчилар учрашув якунларини рўпарада жойлашган "Казмедиацентр"даги қўшма матбуот анжуманида маълум қилишади. У маҳаллий вақт билан 14:00 да бошланиши кутилмоқда ҳамда унда барча делегациялар вакиллари қатнашиши режалаштирилган.