23 январда Қозоғистон пойтахти Остонада бошланган Сурия бўйича музокараларнинг биринчи куни якунланди. Москванинг фикрича, учрашувнинг биринчи куни муваффақиятли кечган. Бу ҳақда Россиянинг Остонадаги музокараларда Суриядаги вазиятни тартибга солиш бўйича делегацияси раҳбари Александр Лаврентьев айтди.

"Фикримизча, биринчи кун етарлича муваффақиятли бўлди. Авваламбор Остонада Суриядаги вазиятни тартибга солиш бўйича халқаро учрашувни ўтказиш ва очишга муваффақ бўлинди", деб айтди Лаврентьев.

"Бошида ишончсизлик, таранглик бўлди, бироқ мухолифат делегацияси Россия сиймосида ваъдасида турадиган ишончли ҳамкорни кўришини тушунди", деб таъкидлаб ўтди Россия вакили. Россия Сурия мухолифатига "агар Россия қандайдир ҳаракатлар ва келишувни кафолатласа, унда бунга ишониш мумкинлигини" етказа олган. "Бошида эҳтирослар кучли бўлганига қарамасдан, томонлар онгли ёндашув кўрсатиб, бу муҳим тадбирнинг барбод бўлишига олиб келиши мумкин бўлган ҳаракатлардан қочишга ҳаракат қилишди", деб таъкидлаб ўтди Лаврентьев.

"Эртанги кунги режаларга келсак. Кўп босқичли музокаралар, жумладан Россия, Туркия ва Эрон делегациялари мутахассисларини жалб қилган ҳолда баъзи масалаларни келишиб олиш учун давом этади. Булар жанговар ҳаракатларни тўхтатиш тартиби, "Жибҳат ан-Нусра" ва ИШИДдан фарқлаш, террорчиликка қарши биргаликдаги кураш масалаларидир", деб айтди Россия вакили.