АҚШ президенти Дональд Трамп АҚШнинг Транс-Тинч океан ҳамкорлиги келишувидан чиқиши ҳақидаги фармонни имзолади, деб хабар бермоқда Reuters ахборот агентлиги. 

АҚШ бошчилигида бир неча йил давомида тайёрланган бу келишув ўтган йил февралида 12 давлат вакиллари томонидан имзоланганди ва Осиё-Тинч океани минтақасида кенгроқ эркин савдо ҳудудини яратишни назарда тутганди. 

Аввалги президент Барак Обама бу келишувни унинг иштирокчиси ҳисобланмайдиган Хитойга қарши иқтисодий курашдаги асосий чоралардан бири сифатида қараганди. Бироқ АҚШ конгресси ҳужжатни ратификация қилмаган ва у кучга кирмаган.

Трамп президентлик лавозимига киришиши биланоқ АҚШнинг бу келишувдан чиқишига эришишига ваъда берганди. Шу билан бирга Трамп келишувга аъзо давлатлар билан якка тартибда савдо бўйича музокараларни бошлашга чоралар кўрмоқда.