24 январь куни Тошкент шаҳрида "2017-2021 йилларда Ўзбекистон Республикасини ривожлантиришнинг бешта устувор йўналишлари бўйича ҳаракатлар стратегияси" лойиҳасининг жамоатчилик муҳокамаси давом эттирилди. Медиаҳафталикнинг иккинчи куни қонун устуворлигини таъминлаш ва суд-ҳуқуқ тизимини янада ислоҳ қилишнинг устувор йўналишларига эътибор қаратилди. 

Бир қатор стратегиялар тақдимотидан сўнг тадбирга ташриф буюрганлар ва видеоконференц алоқада бўлган вилоят вакилларининг саволлари, шунингдек веб-сайт орқали йўлланган саволларга эътибор қаратилди. Таъкидлаш жоизки, берилган саволларда долзарб масалалар кўтарилди. Жумладан, амнистия қўлланганларнинг қанчаси тўғри йўлдан кетгани, бунга доир статистика мавжуд ёки йўқлиги борасида савол билан мурожаат қилинди. Мутахассислардан бири бу борада аниқ статистика йўқлигини айтган бўлса, яна бири бундай статистика олиб борилишини қайд этди, лекин бу борада аниқ рақамлар келтирилмади. 

Шунингдек, оилавий судларни ташкил этиш имкони, прокуратурада рейтинг тизими, нотўғри кўрилган ёки қайта кўришга тақдим этилган ишлар бўйича судьяларга нисбатан санкциялар жорий қилишга оид бир қатор саволлар билан мурожаат қилинди ҳамда уларга тегишли жавоблар олинди.

Саволлар билан бир қаторда таклифлар ҳам киритилгани алоҳида диққатга сазовордир. Хусусан, Тошкент давлат юридик университети магистратура босқичи 1-курс талабаси кадрлар масаласи бўйича ўринли таклиф киритди - юридик кадрларни ўқишга қабул қилишда 36 савол асосида эмас, шахсан суҳбат асосида, уларнинг дунёқараши, билим доираси, инсонийлик хислатларини инобатга олган ҳолда, давлат талабларига жавоб берадиган, шу мақсадда ёнаётган ёшларни ўқишга қабул қилиш таклифи киритилди.

Бундан ташқари, оммавий ахборот воситалари учун муҳим аҳамиятга эга бўлган масала - давлат органлари матбуот хизматларининг ОАВ томонидан бериладиган саволларга жавоб бериши, ўз вақтида янгиликларни тақдим этиш масаласи кўтарилди. Давлат сири тушунчасига нималар киришини рўйхат асосида тақдим этиш ҳамда ОАВ томонидан бериладиган саволларга очиқ-ойдин жавоб бериш таклифи киритилди. 

Шунингдек, зарурат туғилган тақдирда 60 ёшдан ошган кишиларнинг уйига бориб, уларга ҳуқуқий ёрдам кўрсатиш таклиф этилди. 

Хулоса ўрнида айтиш мумкинки, халқ билан очиқ мулоқот қилиш, шу каби анжуманларни ўтказиш ҳуқуқий давлат тизимини такомиллаштириш, юртимиз фаровонлигини таъминлашда катта роль ўйнайди. Бундай мулоқотлар мавжуд камчиликларни аниқ кўрсатиб, вазиятни янада яхшилашга ёрдам беради.