АҚШ конгрессига президентга бирор давлатга уруш эълон қилмасдан, ядровий зарба беришни тақиқловчи қонун лойиҳаси кўриб чиқиш учун киритилди. Бу ҳақда Foreign Policy хабар бермоқда

Қонун лойиҳаси муаллифлари сенатор-демократ Эдвард Марки ва конгрессмен-республикачи Тед Лью ҳисобланади. Таъкидланишича, бундай тақиқлов собиқ президент Барак Обама вақтида муҳокама қилина бошлаган ва ҳеч қандай натижага олиб келмаган. Бироқ  Дональд Трамп ҳокимият тепасига келиши билан бу масала бўйича музокаралар яна бошланди.

"Ядровий уруш инсониятга жиддий таҳдид қилади. Айни вақтда президент Трамп террорчиларга қарши ядровий зарба бериш мумкинлигини тахмин қилди. Афсуски, АҚШ қонунчилиги ихтилоф вақтида  огоҳлантирувчи зарба бериш имкониятини қолдириб, президентга бундай ҳуқуқни беради", деб айтди сенатор Марки.

Унинг фикрича, бошқа ядровий давлат билан ихтилоф вақтида ядровий уруш таҳдиди ошади.

"Конгресс дунёда барқарорликни сақлаб қолиш учун ҳаракат қилиши керак ва АҚШ қандай ҳолатларда ядровий зарба берадиган биринчи давлат бўлиши шартларини аниқ кўрсатиши лозим", деб таъкидлаб ўтди конгрессмен Лью.

Аввалроқ Россия президенти матбуот котиби Дмитрий Песков АҚШ ва Россия ўртасида ядровий куролни симметрик тарзда қисқартиришнинг имкони йўқлигини айтганди.