Жанубий Корея халқаро майдонда жуда кўп муаммоларга дуч келганки, бу унинг яккаланиб қолишига сабаб бўлиши мумкин. Бу ҳақда БМТнинг собиқ бош котиби ва мамлакат президентлигига эҳтимолий номзод Пан Ги Мун баёнот берди. 

"АҚШ ҳукумати тепасига келган Трамп ички масалаларга диққатини қаратиш истагида, Хитой Жанубий Кореяда THAAD ракеталарга қарши мудофаа тизимларини жойлаштиришга қарши, Япония билан муносабатлар ёмонлашмоқда, Россия билан ривожланмаяпти", - деб қайд этган Пан Ги Мун ўз чиқишида. 

Унинг сўзларига кўра, КХДРнинг ракета-ядро дастури ҳам Шимоли-Шарқий Осиё ва бутун дунёга таҳдид солиш билан Корея ярим оролидаги вазиятни издан чиқармоқда. 

"Бундай шароитларда Жанубий Корея миллий манфаатларини ҳимоя қилиши, дипломатияни ривожлантириш, халқаро майдонда бошқа мамлакатлар билан ҳамкорликни янада фаоллаштириши керак", - деб ҳисоблайди БМТнинг собиқ бош котиби. 

"Бизнинг бошқа йўлимиз йўқ. Корея ярим оролидаги вазиятни барқарорлаштириш учун биз АҚШ, Хитой, Россия ва Япония билан бирга ишлашимиз керак", - дея хулоса қилган Пан Ги Мун ва КХДРнинг тез орада ядросизланишига умид билдирган. 

Пан Ги Мун, шунингдек, Кореяда АҚШнинг THAAD тизимлари жойлашиши мамлакат хавфсизлиги учун зарур экани, Хитой томони буни тушунишни истамаётганини таъкидлаган. 

Собиқ бош котиби, КХДР ва Жанубий Корея ўртасида ташкил этилган Кэсон саноат мажмуаси ёпилиши маъқуллаб, Сеул ва Пхеньян ўртасидаги ўзаро ишончни мулоқот эшикларини очиш билан тиклаш зарурлигини қайд этган.