24 январда Остонадаги Сурия бўйича музокаралар ўз поёнига етди. Россия, Туркия ва Эрон ташқи ишлар вазирликлари Сурия масаласини ҳарбий йўл билан ҳал қилишнинг иложи йўқлиги ҳақида умумий фикрга келишди.   

Учта давлат вакиллари 28 соат давом этган мураккаб музокаралардан кейин қўшма баёнот қабул қилишди. Уни Қозоғистон ташқи ишлар вазири ўқиб эшиттирди. 

Учта давлат Сурияда ўт очишни тўхтатиш тартибини бузишга уринишларга биргаликда қарши туриш ҳамда ярашувнинг бузилиши ҳолатларини кузатиб боришга келишиб олдилар.

Шунингдек, ўртамиёна мухолифатни террорчилик ташкилотларидан ажратиш бўйича ишлар олиб борилади. Бироқ ИШИД ёки "Жибҳат ан-Нусра" каби террорчилик ташкилотлари билан ҳеч қандай келишувлар бўлмайди, чунки бу гуруҳлар БМТ Хавфсизлик кенгаши томонидан террорчилик ташкилотлари деб тан олинган.   

Сурия президенти Башар Асад вакилининг айтишича, мухолифат билан бир столда ўтириш осон кечмаган. 

"Бу жуда оғриқли бўлди, чунки улардан баъзилари терактлар амалга оширган. Афсуски, мухолифат Эроннинг кафолатловчи давлат эканидан норозилик билдирмоқда ва унинг салбий роли ҳақида гапирмоқда. Гап сиёсат ҳақида кетганда, эҳтиросларга берилмай, совуққон бўлиш керак. Гап норозиликда эмас, балки биз бу якуний баёнотни туза олганимизда. Биз ҳам Туркиянинг роли салбий деб айтишимиз мумкин эди, бироқ биз дипломатлармиз ва шунинг учун бундай гапирмаймиз. Сиёсатда ўз давлатингни сақлаб қолиш учун душманлар билан ҳам иш кўришга тўғри келиши мумкин ва биз ҳозир айнан шуни қилмоқдамиз", деб айтди Сурия вакили Башар ал-Жафарий. 

Баёнотда Сурия мухолифати қуролланган гуруҳларининг Женевада БМТ бошчилигидаги кейинги музокараларда иштирок этишга тайёрлиги айтилган. Бу учрашув 8 февралга белгиланган.