Япония бош вазири Синдзо Абэ Ўзбекистон Республикаси Президенти Шавкат Мирзиёевга Япония ва Ўзбекистон Республикаси ўртасида дипломатик муносабатлар ўрнатилганининг 25 йиллиги муносабати билан самимий табрик йўллади.

Хатда Ўзбекистон мустақилликка эришган кундан эътиборан мамлакатлар ўртасидаги дўстлик алоқалари изчил ривожланиб бораётганлиги тилга олинади.


“2015 йил октябрь ойида, Япония Бош вазири мамлакатингизга охирги ташрифидан 9 йил ўтиб, мен Бош вазир сифатида Ўзбекистонга ташриф буюрган эдим. Ўзбекистоннинг Биринчи Президенти Ислом Каримов билан музокараларимиз ғоят самарали бўлган, биз турли соҳаларда ҳамкорликни янада ривожлантириш зарурлиги ҳақида якдил фикрга келган эдик.

Мамлакатингизга ташрифим давомида Бош вазир сифатида менга доимо ҳамроҳлик қилганингиз ва юксак даражадаги меҳмоннавозлик учун Сизга самимий миннатдорлик билдираман. Шуни мамнуният билан қайд этмоқчиманки, ушбу ташриф Ўзбекистон ва Япония ўртасидаги муносабатларга янада жадал суръат бағишлади, эришилган келишувлар мамлакатларимиз ўртасидаги кенг миқёсли ҳамкорликни фаоллаштиришга хизмат қилмоқда”, дейилади табрик мактубида.

Япония бош вазири ўзининг мазкур табрик хатида сиёсат ва иқтисодиёт борасидаги муносабатларни ривожлантириш, турли соҳаларда, шу жумладан, маданият ва илм-фан соҳаларида ҳам Ўзбекистон билан дўстона алоқаларни мустаҳкамлаш учун бутун имкониятларини ишга солишга тайёрлигини билдирган.

“Сиз, Жаноби Олийлари билан "Марказий Осиё + Япония" мулоқоти доирасида ҳам фаол ҳамкорлик қилишимиздан умидворман.

Сизга, Жаноби Олийлари, мустаҳкам соғлик, фаолиятингизда муваффақиятлар, Ўзбекистон халқига бахт-саодат ва фаровонлик тилашга рухсат этгайсиз”, дейилади табрик мактубида.