Хитой Шимолий Кореяга икки мақсадда, жумладан оммавий қирғин қуролларини яратишда қўлланадиган товар ва технологияларни экспорт қилишни тақиқлади. Бу ҳақда Хитой тижорат вазирлиги хабарида маълум қилинган. 

Хабарда айтилишича, бу чоралар Шимолий Кореянинг ядровий синовлари билан боғлиқ БМТ Хавфсизлик кенгашининг резолюциясини бажариш учун киритилмоқда.  

Маълум қилинишича, Шимолий Кореяга ядровий қурол, ядровий жанговар каллаклар, биологик ва кимёвий қурол яратишда қўлланиши мумкин бўлган товарлар, материаллар, қурилма ва технологияларни экспорт қилиш тақиқланади. Экспорт қилиши тақиқланган товарлар рўйхатига ракеталар ва учувчисиз парвоз қурилмалари яратиш учун қўлланиши мумкин бўлган дастурий таъминот, кўп қатламли пластиналар яратишга мўлжалланган металлар, юқори тезликдаги видеокамералар, турли телекоммуникацион қурилмалар, лазер қурилмалари, сенсорлар, авиация электрон қурилмалари, ҳаво навигацияси қурилмалари киритилган.