АҚШнинг собиқ давлат котиби, демократ Мадлен Олбрайт президент Дональд Трампнинг иммиграция сиёсатига норозилик сифатида Ислом динига киришга тайёрлигини билдирди. У ўзининг Twitter микроблогида шундай қайдни қолдирган.

"Мен католик динида тарбияландим, сўнгра, Епископаль черковига ўтдим, алалоқибат, оилам яҳудийлар бўлганини билдим. Мен бирдамлик нуқтаи назаридан Исломни қабул қилишга тайёрман. Хуш келибсиз, қочқинлар", - деб ёзган Олбрайт. У Америка "ҳар қандай дин ва ирқдаги кишилар учун эркин ва очиқ бўлиб қолиши керак"лигини қўшимча қилган.

Дональд Трамп 25 январь куни иммиграция сиёсати ва чегара назоратини кучайтиришни кўзда тутувчи фармонларни имзолаган эди. Associated Press агентлиги, ўз навбатида, ҳужжатларга асосланган ҳолда, Трамп 120 кунга АҚШнинг қочқинларни қабул қилиш дастурини тўхтатиш ниятида экани ва камида 30 кунга 7 мусулмон мамлакати фуқароларига виза беришга барҳам беришни режалаштиргани ҳақида хабар қилган эди.