Ислом Каримов номидаги Тошкент халқаро аэропортининг янги терминалини барпо этишда 1407 оилани кўчириш режалаштирилган. Улар 540та тураржойда истиқомат қилишади. Бу ҳақда «Ўзбекистон ҳаво йўллари» МАКнинг 25 йиллиги муносабати билан ўтказилган матбуот анжуманида «Ўзбекистон ҳаво йўллари» ерусти иншоотлари эксплуатацияси департаменти ва аэродромлар бошқармаси раҳбари Антон Ходжаян маълум қилди. Бу ҳақда матбуот анжуманида иштирок этган Кун.Уз мухбири хабар берди.

«Тошкент-4» деб номланган янги халқаро терминал қуриб фойдаланишга топширилгач соатига 1500 йўловчига хизмат кўрсата олади. Терминал биноси афсонавий Ҳумо қушининг қанотларини ёйган шаклида барпо этилади. У 36 самолётга мўлжалланган перрон ва 1700 автомобиль учун тураргоҳни ҳам ўз ичига олади. 

Антон Ходжаяннинг сўзларига кўра, «аҳолини кўчириш ишлари билан Тошкент шаҳри ҳокимияти шуғулланмоқда. Янги терминал жойлашадиган ҳудудда истиқомат қилувчи фуқарога оилага мос келувчи хонадон, ёки ер участкаси ёхуд хоҳишидан келиб чиқиб, молиявий ҳуқуқи поймол қилинмаган ҳолда маблағ берилади». 

Шу масалага чуқурроқ ойдинлик киритган МАК бош директори Валерий Тян, товон пули уй эгасининг рози бўлгунича берилишини алоҳида таъкидлади. Бунда, унинг айтишича, ушбу ҳудудда яшовчилар ҳуқуқи бузилишига умуман йўл қўйилмайди.