Ёш мутахассисларни муносиб меҳнат билан бандлигини таъминлаш мақсадида 2017 йил 28 январь куни соат 10:00да Тошкент давлат иқтисодиёт университетида “Карьера куни” ахборот таништирув тадбири бўлиб ўтади.

Тадбирда университет профессор-ўқитувчилари, бакалавриат ва магистратура босқичининг битирувчи курс талабалари иштирок этадилар. Талаба ёшлар электрон тарқатма материаллар, проспектлар ҳамда бошқа тақдимот услуб ва воситалардан самарали фойдаланиб, касбий ва малакавий билимлари, қобилиятлари ҳамда малакалари тақдимотини ўтказишади.

Таъкидлаш керакки, “Карьера куни” доирасида Ўзбекистон Республикаси Давлат божхона қўмитаси, Туризмни ривожлантириш давлат қўмитаси, Савдо-саноат палатаси, “Ўзбекистон ҳаво йўллари” МАК, Ўзбекистон темир йўллари АЖ, “Камолот” ЁИҲ, Марказий банк, Миллий банк, Микрокредитбанк, Асакабанк, Ҳамкорбанк, Ипотекабанк, Агоробанк, Туронбанк, Ўзсаноатқурилишбанк, Давр банк, ASIA ALLIANCE BANK, ORIENT FINANS BANK, “Korzinka.uz”, “Artel”, “Next”, “Makro”, “Nestle”, “International hotel Tashkent” каби ташкилот ва муассасалар ўз бўш иш ўринлари билан иштирок этиб, битирувчи талаба ёшлар билан ишга жойлашиш ва касбга-йўналтириш бўйича мулоқотлар олиб боради ҳамда шартномалар имзолайди.

“Карьера куни” ахборот-танишитирув тадбирини ўтказишдан мақсад кадрларга буюртма берган иш берувчи корхона ва ташкилотлар билан бакалавриат ҳамда магистратура босқичи битирувчилари ўртасида аниқ интеграцион ва ишга жойлаштириш бўйича тўғридан-тўғри узоқ муддатга мўлжалланган алоқалар ўрнатишдан иборат.


ТДИУ Ахборот хизмати