Пайшанба куни Тошкент шаҳрида Ўзбекистонни ривожлантиришнинг устувор йўналишларига бағишланган Ҳаракатлар стратегияси муҳокамасининг навбатдаги йўналиши муҳокама қилинди - ижтимоий соҳадаги устувор йўналишлар. Бу соҳадаги энг диққатга сазовор тизимлардан бири - фан ва таълим тизими. 

Тадбирда иштирок этган мутахассисларимиз соҳада жуда кенг қамровли масалаларга ойдинлик киритишга тўғри келиши таъкидлашди. Бугунги кунда мактабгача таълим муассасида (МТМ) болалар қамрови 26 фоиз бўлса, дастур ишлаб чиқилгандан кейин 50 та янги боғча қурилиши, 2200 МТМ қайта таъмирдан чиқарилиши натижасида ушбу кўрсаткич 48 фоизга етиши қайд этилди. Шунингдек хусусий боғчаларга эҳтиёж борлиги, уларга кенг имкониятлар яратилиши ҳам айтиб ўтилди. 

Таъкидлаш жиозки, 2017 йилда 300дан ортиқ мактабни қайта таъмирдан чиқариш мақсад қилинган. Бундан ташқари, мактаблар 11 йиллик бўлмаслиги, бундай лойиҳа йўқлиги таъкидланди. Мутахассисларнинг сўзларига кўра, бугунги кунда "9+3" тизимига амал қилинмоқда (яъни 9 йил мактаб ва 3 йил коллеж, лицей). 

Ҳар йили меҳнат бозорига кириб келадиган ярим миллион йигит-қизларни иш билан таъминлаш - катта муаммо эканлигига урғу берилди. Бу борада ишлар олиб борилаётгани таъкидланди. 

Шу ўринда, аҳолининг 60 фоизи 30 ёшгача бўлган ёшлардан иборат эканлиги ва бу ёшларга доир сиёсатни такомиллаштиришни талаб қилиши алоҳида қайд этилди. Ёшларимиз бугунги кунда қандай мафкуравий йўналишда кетяпти, уларнинг интеллектуал салоҳиятини ошириш, илм-фан, спорт, санъат билан шуғулланишга жалб қилиш муҳимлигига эътибор қаратилди.