Ўзбекистон ва Украина умумий қиймати 7,05 миллион АҚШ доллари бўлган ўзбек маҳсулотлари экспортига шартномалар имзолади.

“Жаҳон” ахборот агентлиги маълумотига кўра, Ўзбекистоннинг Киевдаги элчихонасида Ўзбекистон ва Украина ишчи доиралари вакиллари ўртасидаги келишувларга имзо чекиш маросими бўлиб ўтган.

Ташриф давомида «Ўзсаноатэкспорт» АЖ ва «Ўзтадбиркорэкспорт» АЖ вакиллари Ўзбекистон ишлаб чиқарувчилари маҳсулотини Украинага экспорт қилиш бўйича шартномалар имзолади.

Маълум бўлишича, шартномалар 30 минг тонна аммиакли селитра ва 30 минг тонна карбамид экспортига имзоланган.

Ўзбек томони Украина ҳудудида Ўзбекистонда ишлаб чиқарилган минерал ўғитлар, текстиль маҳсулотлари ва халқ истеъмоли товарларини тизимли равишда етказиб беришни таъминлаш мақсадида савдо уйларини ташкил этиш ҳақида қарор қабул қилди. Кутилишича, савдо уйлари 2017 йилнинг февралидан ўз фаолиятини юрита бошлайди.