АҚШ президенти Дональд Трамп жума куни қочқинлик мақоми берилган мурожаатларни кўриб чиқишда суриялик насронийларга кўпроқ эътибор қаратиши ҳақида маълум қилди.

Трампдан Christian Broadcasting Network’га берган интервьюсида насронийларга эътибор кучайтириладими, деб сўрашган.

"Ҳа, улар билан жуда ҳам ёмон муносабатда бўлишмоқда. Агарда сиз суриялик насроний бўлсангиз, Қўшма Штатларга кириш жуда ҳам мушкул. Агарда сиз мусулмон бўлсангиз, киришингиз мумкин эди, бироқ насроний бўлса – бу деярли имконсиз бўлган", - деди у.

Трамп сўзларига кўра, насронийлар Сурияда кўпроқ террорчилардан азият чекишмоқда. "Улар (террорчилар) у ерда ҳамманинг бошини танасидан жудо қилишган, бироқ кўпроқ насронийлар жабр кўрган. Ўйлашимча, бу ноҳақлик. Шунинг учун биз уларга (насронийларга) ёрдам берамиз", - деди у.

Трамп бир йил аввалги сайловолди кампанияси вақтида ҳам насронийларни ҳимоя қилишга ваъда берган. Насроний жамоат ташкилотлари вакиллари бу инсонлар бир қатор мамлакатларда, биринчи навбатда, Яқин Шарқда хавф остида қолаётганликларини маълум қилишганди. 

Маълумот учун, АҚШ 2016 молиявий йилда Суриядан 12,5 минг қочқинни қабул қилган. Бу эса кўплаб бошқа давлатлар, жумладан, Туркия ва Европа Иттифоқи мамлакатларидан анча кам дегани.