АҚШ президенти Дональд Трамп 28 январда телефон орқали Россия президенти Владимир Путин, Франция президенти Франсуа Олланд ва Германия канцлери Ангела Меркель  билан суҳбатлашади. Бу ҳақда Оқ уй матбуот котиби Шон Спайсер маълум қилди.

"Президент ўз президентлигининг биринчи ҳафтасидан максимал фойда кўриб, эртага Франция, Германия ва Россия етакчилари билан телефон орқали гаплашади", деб айтилган Спайсернинг твиттерида. 

Аввалроқ Трампнинг маслаҳатчиси Келлианн Конуэй CBS телеканалига берган интервьюсида Трамп ва Путин телефон суҳбати чоғида "радикал террорчиликни қандай енгиш мумкинлиги" ва бошқа бир қатор масалаларни муҳокама қилишларини маълум қилганди.     

Россия президенти матбуот котиби Дмитрий Песков икки давлат етакчиси ўртасида суҳбат бўлишини тасдиқлаган. Суҳбат давомида Путиннинг Трампни лавозимини бажаришга киришгани билан табриклаши режалаштирилган.