Дэвид Бекҳэм BBC Radio 4 эфирида ўз вақтида «Реал» эмас, «Барселона» футболчиси бўлишига яқин келгани ҳақида гапирди.

«МЮ» клубида мен учун ноқулай бўлган вазият вужудга келган эди. Бир неча ўйинларда майдонга тушмадим. Шундан сўнг мени сотиб юборишлари мумкинлиги ҳақида хабарлар тарқалди.

Рафиқам Виктория билан АҚШда дам олаётганимда, танишим қўнғироқ қилиб, ТВда «Барселона»га ўтганим ҳақидаги хабарни эшитганини айтди. Тезда Лондонга қайтиб, МЮ раҳбарияти билан учрашдим. Улар мени «Барселона»га сотиш бўйича келишиб қўйишгани ҳақида маълум қилишди. Шунда, агентим орқали агар кетсам, фақат «Реал»га кетишим, «Барселона»га ўтмаслигим ҳақида айтдим. Бир кундан сўнг Мадридда «Реал» билан шартнома имзоладим.

Шундан сўнг 3 йил давомида мен «Юнайтед» ўйинларини кузатмадим ҳам, бу жамоанинг муносабатидан қаттиқ ранжигандим. 

Аслида фаолиятимни «МЮ» клубида якунламоқчи эдим, «Олд Траффорд»ни тарк этганимдан анча вақтгача ўзимга кела олмагандим», деган Бэкҳем.

Бекҳэм «қизил иблислар» жамоаси тарбияланувчиси ҳисобланади ва бу жамоада 379 учрашув ўтказган, аммо мураббий сэр Алекс Фергюсон билан муносабатлари ёмонлашгач, жамоадан кетишга мажбур бўлганди.