Нигерияда 130 нафар рафиқаси ва 203 нафар фарзанди борлиги билан машҳур бўлган Алхожи Муҳаммад Абубакар Белло Масаба 93 ёшида вафот этди, деб хабар бермоқда Daily Trust нашри.

Имомлик қилган эркак ҳаётлигида "супер кўп хотинли эркак" деб тан олинганди. Масаба интервьюларидан бирида журналистларга унинг ҳаётидаги энг қийин иш – шундай катта оилани эплаш бўлганини ва бунда унга "Тангрининг ўзигина ёрдам беришини" тан олган.  

Масабанинг кўп хотинлик борасидаги қарашларини ҳамма ҳам маъқулламаган. У 84 ёшда, хотинлари ва фарзандлари мос равишда 86 ва 170 нафар бўлганда, ислом суди ундан Қуръонда айтилгандек, 4 нафар хотинни қолдиришни талаб қилган. Акс ҳолда, у ўлим жазосига тортилиши мумкин эди. Бунга жавобан Масаба Қуръонда 4 нафардан кўпроқ хотинга эга бўлганлик учун жазолаш кераклиги ҳақида ҳеч нарса айтилмагани важ қилган.