Испания пойтахти Мадрид шаҳри ҳокими Мануэла Кармена АҚШ президенти Дональд Трампни Адольф Гитлер билан таққослади. Бу ҳақда ABC газетаси хабар берди.

Унинг маълумотига кўра, шаҳар раҳбари Оқ уй етакчисини АҚШдаги муҳожирлик сиёсатини кучайтирувчи сўнгги қарорлари сабаб танқид қилди. “Биз бу қонуний йўл билан тайинланган ҳукумат эканлигини ҳамда уни фуқароларнинг аксарият қисми қўллаб-қувватлашини биламиз. Бироқ XXI асрда инсон ҳуқуқларини жуда ҳам қўпол равишда бузаётганликлари гувоҳига айланмоқдамиз. Бу ҳолат аввал ҳам қўллаб-қувватлашган бир ҳукуматдаги каби такрорланмоқда”, - деган Кармена ҳокимиятдаги йиғилиш аввалида.

ABC Кармена Трампни Гитлер билан таққослагани борасида аниқ иқтибосларни келтирмади. Бироқ бундай ўхшатиш ҳақиқатдан ҳам бўлганини бошқа Испания ОАВ: EFE ахборот агентлиги, El Pais газетаси ҳам тасдиқлади.

Шаҳар ҳокими сўзларидан сўнг “Фуқаролар” партияси ва Испания ишчилар социалистик партияси вакиллари қарсак чалишган бўлса, Халқ партияси вакиласи Эсперанса Агирре Кармена фикрлари билан қўшилмаслигини маълум қилиб, Америка раҳбарияти қарорлари “ёқиш ёки ёқмаслиги мумкин” деб таъкидлаб ўтган. Агирре “дунёдаги энг ёмон тоталитаризм туғилган Европадан демократия дарсларини” бермасликка чақирди.

Аввалроқ Трамп “Мамлакатнинг хорижий террорчилар кириб келишидан ҳимояси тўғрисида”ги фармони билан мамлакатга 90 кун давомида Эрон, Ироқ, Яман, Ливия, Сурия, Сомали ва Судан фуқаролари кириб келишини тақиқлаб қўйди. Ҳужжат шунингдек барча қочқинларни қабул қилишни 120 кунга тўхтатиб туриш ҳамда Суриялик қочқинларни қабул қилишни номаълум муддатга қолдиришни ҳам назарда тутади.