15:19 / 30.01.2017
5184

Hollivud yulduzlari Trampning migrantlar haqidagi farmonidan norozi

Hollivud yulduzlari AQSh Kinoaktyorlar gildiyasi mukofotini topshirish marosimida mamlakat prezidenti Donald Trampning qochqinlar va yetti mamlakat fuqarolarining AQShga kirishini taqiqlovchi farmonini tanqid ostiga olishdi. Bu haqida The Hollywood Reporter nashri xabar berdi

Xususan "Vitse-prezident" seriali orqali tanilgan aktrisa Juliya Luis-Dreyfus taqiqlovdan dahshatga tushgani, zero o‘zi ham muhojirning farzandi ekanini ta'kidladi. Uning so‘zlariga ko‘ra, otasi natsistlar tomonidan egallangan Fransiyadan qochgan bo‘lgan.

Aktyor Mahershala Ali ("Oy shu'lasi"), o‘z navbatida, AQShda musulmon bo‘lish qanday ekani to‘g‘risida nutq so‘zladi. 

Akstrisa Kerri Vashingtonning qizil yo‘lakcha bo‘ylab o‘tgan ko‘ylagida qochqinlarga hamdardlik bildirish ramzi bo‘lgan to‘g‘nog‘ichni ko‘rish mumkin edi. Marosimning boshqa ba'zi mehmonlari ham xuddi shunday yo‘l tutishdi. 

"Katta portlash nazariyasi" yulduzi Saymon Helberg va uning turmush o‘rtog‘i Joslin Taun suratkashlarga "Qochqinlarni xush ko‘rdik" mini-plakatini namoyish etishdi. 

Top