АҚШ президенти Дональд Трамп ОАВлари муҳожирлик сиёсати ҳақидаги сўзларини “мусулмонлар учун тақиқ” деб нотўғри талқин қилишганини айтиб ўтди. 

- Аниқлик киритмоқчиман - бу мусулмонларга тақиқ эмас. ОАВ буни нотўғри тушунишди. Бу дин билан боғлиқ масала эмас – бу террор ва мамлакатимиздаги хавфсизлик ҳақида. Бу фармонда сўз юритилмаган дунё бўйлаб 40дан ортиқ ҳар хил давлат бор ва уларда асосан мусулмонлар истиқомат қилади, - дейилади Америка президенти махсус баёноти матнида.

Аввалроқ Трамп “Мамлакатни хорижий террорчилар кириб келишидан ҳимояси тўғрисида”ги фармони билан мамлакатга 90 кун давомида Эрон, Ироқ, Яман, Ливия, Сурия, Сомали ва Судан фуқаролари кириб келишини тақиқлаб қўйди. Ҳужжат шунингдек барча қочқинларни қабул қилишни 120 кунга тўхтатиб туриш ҳамда Суриялик қочқинларни қабул қилишни номаълум муддатга қолдиришни ҳам назарда тутади.