Туркия ва Исроил ўртасида 2010 йилда бошланган ўзаро муносабатлардаги нифоқдан кейинги биринчи турк-исроил маслаҳатлашувлари 1 февралда Анқарада бўлиб ўтади. Бу ҳақда Anadolu ахборот агентлиги хабар бермоқда

Маълум қилинишича, Туркия  делегациясига ташқи ишлар вазирлиги маслаҳатчиси Умит Ялчин, Исроил делегациясига эса Исроил ташқи ишлар вазирлиги бош директори Юваль Ротем бошчилик қилади. Бундан ташқари, Туркия ҳукумати аъзоларидан бири шу ҳафтада Исроилга ташриф буюради.

Исроил ва Туркия "Эркинлик флотилияси" воқеаси юз бериши – 2010 йилда Исроил "коммандоси" томонидан Ғазо сектори қамалини ёриб ўтиш учун кетаётган кемаларнинг қўлга олиниши ва 9 нафар туркнинг ҳалок бўлишидан кейин ўз элчиларини чақиртириб олган.    

Ихтилофни енгиш учун давлатларга 6 йил талаб қилинди. Муносабатларнинг нормаллаштирилиши ҳақидаги келишувда элчиларнинг қайтарилишидан ташқари, турк фуқароларининг ўлими учун 20 млн доллар товон пули тўлаш, исроиллик ҳарбийлар ва сиёсатчиларни бўлган воқеа юзасидан суд томонидан тақиб қилинишини бекор қилиш кўзда тутилган.