Қозоғистонда инвестициялар билан шуғулланувчи янги миллий компания яратилади. Бу ҳақда Қозоғистон миллий иқтисодиёт вазири Тимур Сулейменов маълум қилди, деб хабар бермоқда NewTimes.kz ахборот агентлиги. 

Сулейменовнинг айтишича, президент танқиди ўринли деб қабул қилинган, чунки Қозоғистонда ҳозирда инвестицияларни жалб қилиш билан бир неча ташкилот шуғулланмоқда.     

"Шу муносабат билан президент томонидан аниқ топшириқ – "ягона дарча" тамойили асосида ишловчи ягона миллий компанияни ташкил қилиш вазифа қилиб берилди", деб маълум қилди Сулейменов. 

Сулейменовнинг таъкидлашича, Қозоғистонда инвестицион муҳитнинг яратилиши нафақат миллий иқтисодиёт вазирлиги, балки бутун ҳукуматнинг вазифасидир.

"Инвестицияларни жалб қилиш – бу инвесторни қўлидан тортиб олиб келиш эмас, балки яхши инвестицион ва бизнес-муҳитни яратиш демакдир", деб таъкидлаб ўтди вазир.