Исроил бош вазири Биньямин Нетаньяху Эрон ҳукуматини БМТ Хавфсизлик кенгаши резолюциясини "қасддан бузиш"да айблади. Исроил бош вазири Теҳроннинг ўрта масофаларга уча оладиган ракета синовларини ўтказганига шундай баҳо берди. БМТ ХК резолюциясига кўра, Эрон баллистик ракеталар синовини ўтказиши мумкин эмас. Расмий Теҳрон бунга жавобан, ядро каллакларига эга эмаслигини айтади. 

Нетаньяхунинг баёнот беришича, у АҚШ президенти Дональд Трамп билан февраль ойида ўтказажак учрашувида Эронга нисбатан санкцияларни тиклаш имкониятларини муҳокама қилади. "Эрон агрессияси жавобсиз қолмаслиги керак", - деган Исроил ҳукумати раҳбари. 

Аввалроқ, қатор ОАВ Пентагон вакилига таянган ҳолда хабар беришича, 29 январь куни Эрон ўрта масофага уча оладиган ракетани синовдан ўтказган. У Теҳрондан 225 км шарқдаги полигондан ҳавога кўтарилган. 

АҚШ маъмуриятидаги манбаларнинг журналистларга маълум қилишича, синов муваффақиятли бўлмаган, ракета нишонга етмасдан қулаб тушган.