Қозоғистон президенти Нурсултон Назарбоев 30 январь куни кечқурун мамлакат телеканаллари орқали махсус чиқиш қилди. Унинг мурожаати матни 31 январь оқшомида эълон қилинади.

Нурсултон Назарбоев сўнгги бор 25 январь куни халққа махсус мурожаат билан чиқиш қилганди.

Телеканаллар орқали қилган чиқиши чоғида, Қозоғистон президенти мамлакатда кутилаётган конституциявий ислоҳот, жумладан, ҳокимият тақсимоти ҳақида гапирган.

«25 йил давомида биз икки модернизацияни амалга оширдик. Биринчиси — бозор иқтисодиёти тамойилларига асосланган буткул янги давлатнинг яралиши. Иккинчиси —«Стратегия—2050» лойиҳаси амалга оширилиши ва пойтахт Остонанинг барпо этилиши.

Бугун дунёда технологик йўналишда юз бераётган туб ўзгаришлар иқтисодий ўсишнинг янги моделига ўтишни талаб қилмоқда. Шу сабабли халққа мурожаатим Қозоғистоннинг учинчи модернизациясига бағишланади. Бизнинг вазифамиз — мамлакатнинг янги шароитлардаги глобал рақобатбардошлилигини таъминлаш», — дея таъкидлаган президент.

У давлатнинг сиёсий модернизацияси ва янги технологик модернизация бир-бирини тўлдириши ва мамлакатнинг узоқ муддатли ривожланиши учун хизмат қилишини билдирган.

Президентнинг айтишича, мамлакат фақат шу тариқа «Стратегия—2050» лойиҳасининг асосий мақсади — Қозоғистоннинг дунёнинг энг ривожланган 30 давлати қаторига киришига эришиши мумкин.