Instagram fotoservisi tez orada foydalanuvchilarga bir necha suratni bir urinishda joylash imkonini taqdim etishi kutilmoqda. Bu haqida The Verge nashri xabar berdi.
Nashrda ta'kidlanishicha, avval bu funksiyadan faqat reklama beruvchilar foydalanishlari mumkin edi, biroq endi ilovaning beta-test dasturi ishtirokchilari ham uni qo‘llash imkoniga ega bo‘lishdi.
Bir necha surat yoki videoni bir vaqtda taqdim etish ularning har birini uzoq bosib turish orqali amalga oshiriladi. Dasturda o‘ntagacha surat yoki rolikni bittada joylash imkoni mavjud, foydalanuvchilar ularni biryo‘la bir klikda qayta ishlashlari yoxud har biriga alohida filtr tanlashlari mumkin bo‘ladi.
Beta-testerlarning guvohlik berishicha, hozirgi vaqtda mazkur funksiya to‘g‘ri ish bermayapti: bir necha suratni bittada joylashga harakat qilinganda ilova xato ishlab, bu vazifaning uddasidan chiqmagan. The Verge'ga ko‘ra, fotoservis vakillari funksiyaning keng ko‘lamli ishga tushish muddatiga izoh berishdan voz kechishgan.
"Umid qilamizki, u yaqin orada ishga tushadi, zero bu bizning lentamizni dam olish maskanlari, bolalar va to‘ylar kabi oxiri yo‘q suratlardan xalos etadi".
