Германия Социал-демократик партияси биринчи маротаба оммавийлик бўйича канцлер Ангела Меркель блокидан ўзиб кетди. Германиянинг жамоатчилик фикрини ўрганувчи институти INSA’нинг Bild нашри буюртмасига кўра ўтказган сўровномасига мувофиқ, социал-демократларга сўралганларнинг 31 фоизи, Меркель блоки – Христиан-демократик ва Христиан-социал иттифоқларга 30 фоизи овоз беришга тайёрликларини билдирганлар.  

Ўтган ҳафтада ўтказилган шундай сўровномага кўра, Социал-демократик партия рейтингини 4 фоизга яхшилаган, Меркель блоки эса аксинча 3 фоиз йўқотган. Шу тариқа, Бундестагдаги навбатдаги сайловларга ярим йил қолаётганда социал-демократлар ўзларининг амалдаги етакчи коалиция бўйича шерикларидан ўзиб кетишга муваффақ бўлдилар.

Иккала сиёсий куч ҳам 24 сентябрда ўтадиган сайловларда ғалаба қилишни ўз олдига вазифа қилиб қўйган.