Тожикистон президенти Эмомали Раҳмоннинг 29 ёшли ўғли Рустам Эмомалини Душанбе ҳокими этиб тайинланишида мамлакат қонунчилиги бузилмаган. Бу ҳақда журналистларга республика давлат хизмати бўйича агентлиги раҳбари Жума Давлатов маълум қилди.

Тожикистон президентининг катта ўғли Душанбе ҳокими этиб 12 январь куни тайинланди. У бу лавозимда Маҳмудсаид Убайдуллаевни алмаштирди. Аввалроқ Рустам Эмомали Тожикистон божхона қўмитаси ва коррупцияга қарши маҳкамаси раҳбари бўлиб ишлаган.

"Рустам Эмомалини пойтахт раҳбари этиб тайинланишида мамлакат қонунчилиги бузилмаган. Бу Тожикистонда бир неча йиллардан бери олиб борилаётган давлат тузилмаларига ёш кадрларни жалб этиш бўйича сиёсатнинг давомидир", - деди Давлатов. Унинг таъкидлашича, "президент фарзандларига давлат тузилмаларида юқори лавозимларни эгаллашни ҳеч ким тақиқлай олмайди".

Шунингдек агентлик раҳбарининг хабар беришича, Тожикистон шаҳар ва туман раислари ўз мажбуриятларини бажариш бўйича республика бош вазирига тўғридан-тўғри бўйсунади.

Унинг эслатишича, Рустам Эмомалида – маҳаллий ва хорижий олий таълим муассасаларини битирганликдан далолат берувчи учта диплом бор.

"У лавозимидаги илк кунларидаёқ барча мажбуриятларини яхши уддалай олишини кўрсатиб берди. Унинг молиявий назорат ва коррупция билан кураш агентлиги раҳбари сифатидаги ишига ҳам ҳеч қандай саволлар бўлиши мумкин эмас", - дея хулоса қилган Давлатов.