O‘zbekiston Xalq artisti Tolib Karimov bugun, 7 fevral kuni 77 yoshini nishonlamoqda.
Ustoz san'atkor 1940 yilda Toshkent shahrida tug‘ilgan. U 1961 yilda A.N.Ostrovskiy nomidagi Toshkent teatr va rassomlik san'ati institutining aktyorlik fakultetini tugatgach, 1961—63 yillarda institut yo‘llanmasi bilan Qo‘qondagi Hamza nomli teatrda aktyor sifatida ijodiy faoliyatini boshlaydi.
Tolib Karimov 1963 yilda Hamza nomidagi O‘zbek davlat (hozirgi O‘zbek Milliy) akademik drama teatriga ishga o‘tib, to shu kungacha ushbu teatrda faoliyat ko‘rsatib kelmokda. Shu davrda u g‘arb dramaturglari, rus va boshqa qardosh xalqlar, shuningdek, o‘zbek dramaturglarining asarlari asosida sahnalashtirilgan qirqdan ortiq spektakllarda asosiy rollarni o‘ynadi.
Tolib Karimov ijodini televideniyesiz tasavvur qilib bo‘lmaydi. U O‘zbekiston televideniyesida tayyorlangan o‘ttizdan ortiq telepostanovkalarda, shuningdek, "Otalar so‘zi — aqlning ko‘zi" teleko‘rsatuvlarida ham ko‘plab asosiy rollarni ijro etdi.
Tolib Karimovga 1987 yilda "O‘zbekiston xalq artisti" faxriy unvoni berildi. "Qutlug‘ qon" spektaklida Tantiboyvachcha rolini ijro etgani uchun u 1989 yilda Davlat mukofotiga sazovor bo‘ldi. Aktyor 1997 yilda "Mehnat shuhrati" ordeni bilan taqdirlandi.
Kun.uz tahririyati O‘zbekiston xalq artisti Tolib Karimovni tavallud kuni bilan tabriklaydi. Ustoz san'atkorga uzoq umr, mustahkam sog‘liq tilab qoladi.
