Америкалик актёр Жек Николсон етти йиллик танаффусдан кейин катта экранларда пайдо бўлади. У "Оскар"га номзоди қўйилган "Тони Эрдманн" фильмининг инглиз тилидаги римейкида суратга тушади. Associated Press шу ҳақида хабар берди. 

Манбага кўра, картинада америкалик актриса Кристен Уиг ҳам суратга тушади. Кристен "Марслик", "У" ва ""Уолтер Миттининг ажойиб ҳаёти" фильмларидаги роллари билан танилган.

Бундан аввал германиялик Марен Аденинг "Тони Эрдманн" фильми "Хорижий тилдаги энг яхши фильм" номинациясида  "Оскар" мукофотига номзод бўлган эди. Комедия жанридаги фильмда нафақахўр отанинг консалтинг компаниясида топ-менежер бўлиб ишлайдиган қизи билан муносабатлари ёритилган. 

Таъкидланишича, картина 2016 йилда Франциянинг "Сезар" киномукофотига номзод бўлган. 

Январь ойида актёр Питер Фонда Николсоннинг нафақага чиққани ҳақида маълум қилганди.