Оқ уй оммавий ахборот воситаларига АҚШга кириши тақиқланган етти давлатнинг террорчиликда гумон қилинаётган фуқаролари рўйхатини тақдим этди. Бу ҳақда РИА «Новости» хабар берди.

Оқ уйда таъкидлашларича, рўйхатда АҚШда террорчилик билан боғлиқ айбловлар қўйилган Сомали, Судан, Ироқ, Эрон, Яман, Сурия ва Ливиядан бўлган камида 24 нафар қочқин ва муҳожир номи бор. Таъкидланишича, гумонланувчилардан ҳеч бири жиноят содир этишга улгурмаган.

Аввалроқ бир неча нашрлар АҚШ президенти Дональд Трамп фармони таъсири доирасига тушган етти давлатнинг биронта фуқароси АҚШда террорчилик фаолиятида айбдор эканига шубҳа билдирганди.

Трамп фармонини тўхтатиб қўйган судья ҳам Қўшма Штатларда 2001 йилнинг 11 сентябрь куни оммавий теракт ижрочилари орасида кўрсатиб ўтилган етти давлатнинг бирорта фуқароси бўлмаганини маълум қилган.