AQSh qit'alararo ballistik raketa uchirdi

AQSh Minuteman III qit'alararo ballistik raketasining yangi parvozini amalga oshirdi. Marshall orollaridagi poligon tomon uchirilgan raketa 6,8 ming km ga yaqin yo‘l bosib o‘tgan, deb ma'lum qildi AQSh harbiy-havo kuchlarining global zarba qo‘mondonligi. 

Raketa 8 fevralda mahalliy vaqt bilan yarim tunda Vandenberg bazasidan uchirilgan. U Tinch okeanining janubiy qismidagi poligonga otilgan. "Sinov parvozlari xavfsiz va samarali yadroviy himoyaning mavjudligini ta'minlash uchun qurilmaning aniqligi va ishonchligini tekshirishga hamda qimmatli ma'lumotlar olishga imkon beradi", deyilgan xabarda.

Raketa bir kun avval uchirilishi kerak bo‘lgan, biroq bunga Pentagon pudratchilarining maoshlari borasida chiqqan nizo xalaqit qilgan. 

Minuteman III ballistik raketasi AQSh qurollanishida 1970 yildan beri turadi va muntazam ravishda takomillashtirib turiladi.