Biatlon. 2,5 yillik tanaffusdan keyin sportga qaytgan Domracheva shohsupada (foto)

Avstriyaning Xoxfiltsen shaharchasida davom etayotgan biatlon bo‘yicha jahon chempionatining ayollar o‘rtasidagi quvlashmachoq poyga turida g‘oliblar nomi ma'lum bo‘ldi.

Sprint natijalariga ko‘ra, ikkinchi bo‘lib startga chiqqan germaniyalik Laura Dalmayyer 20ta o‘q otishdan 19tasini aniq amalga oshirib birinchi o‘rinni egalladi. Quvlashmachoq poygani 1.28 daqiqa kech boshlab (27-o‘rinda) boshlagan belaruslik Darya Domracheva 20tadan 20ta aniq o‘q otish bilan ikkinchi o‘rinni egalladi. Domracheva yetakchidan 11 soniyaga ortda qoldi. Bronza medalini sprint g‘olibi chexiyalik (20tadan 18ta aniq o‘q otish) Gabriela Koukalova qo‘lga kiritdi.

Erkaklar o‘rtasidagi quvlashmachoq poyga Toshkent vaqti bilan 19:00da boshlanadi. Sprintda germaniyalik Benedikt Doll g‘alaba qozongan bo‘lsa, Yohannes Byo ikkinchi, Marten Furkad uchinchi o‘rinni qo‘lga kiritgandi.