14 февраль куни Малайзия пойтахти Куала-Лумпур шаҳридаги аэропортда ўлдирилган Ким Чен Намнинг, яъни КХДР етакчиси Ким Чен Иннинг акаси оиласи Хитой ҳукумати ҳимоясида бўлади. Бу ҳақда Жанубий Корея Миллий разведка бошқармаси вакилига асосланиб, Ёнҳап агентлиги хабар тарқатди.

Хабарда айтилишича, марҳумнинг собиқ рафиқаси ва унинг ўғилларидан бири шу кунга қадар Пекинда яшаб келмоқда, унинг иккинчи хотини, яна бир ўғли ва қизи эса Макаода. Уларнинг барчаси Хитой ҳукумати томонидан ҳимоя қилинади.

Ўз вақтида КХДР раҳбари меросхўри бўлган Ким Чен Нам 2001 йилда отаси Ким Чен Ирнинг ғазабига учрагач, мамлакатни тарк этишга мажбур бўлганди, 2011 йилда ўгай укаси Ким Чен Ин ҳукумат тепасига келгач эса, яшириниб яшашга мажбур бўлди. У аввалига Макаода яшаб, бизнес билан шуғулланган, кейинроқ Сингапур ва Малайзияга ўтган.

14 февраль куни Куала-Лумпур аэропортида у ўзини ёмон ҳис қила бошлади ва кўп ўтмасдан жон берди. Қайд этилишича, унинг ўлими у Макаога учмоқчи бўлганида рўй берди.

Малайзия полицияси унинг шахсини тасдиқлади. 

Турли манбаларга кўра, унга заҳарли игна билан қуролланган 2 аёл суиқасд қилди, улар воқеа жойидан жўнаб кетишган. Айтилишича, улар шимолий кореялик махсус жосуслар эди. Қотиллар воқеа жойини таксида тарк этишган, аммо улар Малайзияни тарк этишгани гумон. Япониялик мутахассисларнинг фикрича эса, қотилларнинг ўзи ҳам йўқ қилиб бўлинган.