Сурия президенти Башар Асад АҚШ раҳбари Дональд Трампнинг бир қатор мамлакатлардан қочқинларни қабул қилиб олишни чекловчи фармони сурияликларга қаратилмаган деб ҳисобламайди. 

"У Ғарбга кириб келиши мумкин бўлган террорчиларга қарши йўналтирилган. Ва бу рўй бериб бўлди. Бу Европада, асосан – Германияда рўй берди", - дея маълум қилди Асад Франциянинг Europe1 радиостанциясига берган интервьюсида.

Унинг фикрича, "Трампнинг мақсади – мамлакатга шундай кишилар кириб келишини тақиқлашдир".

"Мени хавотирга солаётган нарса – бу сурияликларни АҚШга жўнатиб юбориш эмас, балки Сурияга қайтариш имкониятидир. Мен улар бошқа мамлакатларга кетаётганини кўришдан хурсанд эмасман. Мен – улар Сурияга қайтишни исташса, бундан бахтли бўламан. Сабаби сурияликларнинг аксарияти террорчилик ёки ғарб санкциялари туфайли кетмоқда", - деди Асад.

Унинг қўшимча қилишича, "АҚШ президенти ва ғарб мамлакатларидан эмбаргони олиб ташлаш ҳамда террорчиларни қўллаб-қувватлашни бас қилиш ҳақида сўрашни" режалаштирган.

Аввалроқ АҚШ президенти Дональд Трамп "Мамлакатнинг хорижий террорчилар киришидан ҳимояси тўғрисида"ги фармонга имзо чекди. У АҚШга 90 кун давомида етти мамлакат (Эрон, Ироқ, Яман, Ливия, Сурия, Сомали ва Судан) фуқаролари киришини тақиқлади, шунингдек барча қочқинларни қабул қилишни 120 кунга тўхтатиб қўйди. Фармон АҚШнинг ўзида ҳам, жаҳонда ҳам катта танқидларга учради.