Ferrari компанияси 812 Superfast номли янги суперкарни тақдим этди. 800 кучли ушбу «грантуризмо» F12berlinetta’ни алмаштириши режалаштирилган. Бу кам нусхада чиқарилган гибридли LaFerrari’дан сўнг марканинг энг кучли серияли моделидир.

Янги машина 6,5 литрли ўн икки цилиндли двигателга эга бўлиб, у F12berlinetta’нинг яхшиланган нусхаси - F12tdf’дан 20 от кучига кучлироқ. Максимал кучга эса дақиқасига 8500 айланиш давомида етилади. Мотор иккита роботлаштирилган узатмалар қутиси билан жуфтликда ишлайди.

Орқа узатмали суперкар “юзга” 2,9 сонияда етади. Максимал тезлик эса соатига 340 километрни ташкил этади. Ferrari 812 Superfast’нинг динамик жиҳатлари F12tdf билан бир хилда. Шу билан бир қаторда, янгилик 110 килограммга оғирроқ бўлиб, 1525 килограммга тенг.

Купе тўла бошқарилувчи шасси, фаол аэродинамика, Side Slip Control тизими ва бутунлай нур диодли фараларга эга. Бундан ташқари, машина руль бошқарувининг электр кучайтиргичига эга бўлган биринчи Ferrari бўлади.

Модель Женевада март ойида ташкиллаштирладиган моторшоуда кенг оммага тақдим этилади.