The New York Times нашри мухбири Иван Нечепуренко Москва шаҳридаги Россия ташқи ишлар вазирлигининг ошхонасида машҳур таом номи ўзгартирилганига эътибор қаратди. Маълум бўлишича, “киевча котлетлар” номи билан машҳур бўлган таом у ерда “қримча котлетлар” деб ёзиб қўйилган бўлган.

Котлетлар “салат-микс” гарнири билан бирга берилган. Журналистнинг ўзи эса РФ ТИВда бу машҳур егуликнинг номи ўзгартириб қўйилганига ортиқча изоҳ беришни истамади. У “Мария Владимировна (Захарова – Россия ташқи ишлар вазирлиги амалдори) мени ер билан яксон қилишини истамайман”, деган.

Шундан сўнг ТИВда Нечепуренкога жавоб қайтаришиб, ошпазнинг бу котлетни қандай усулда тайёрлагани ва унга қандай масаллиқлар сарфлагани ҳақида изоҳ беришди: “Тайёр жўжа гўштини кесиш, туз ва мурч қўшиш лозим. Сариёғ бўлагини солиб, барча томонлардан ўраб чиқиш ҳамда “арча ғуддаси” шаклига келтириш керак. Оқ ун ва льезонга булаб олгандан сўнг, 180 даражали ҳароратда қовуриш талаб этилади”. Маълумот учун, льезон – тухум ва сут аралашмаси.

Афтидан, “қримча котлетлар”ни тайёрлаш усули оддий “киевча котлетлар”дан ҳеч нарса билан фарқ қилмайди. Албатта, улар Россия ташқи ишлар вазирлиги биносида тайёрланишидан ташқари.