Малайзияда вафот этган, Шимолий Корея етакчисининг акаси Ким Чен Намнинг жасади ёрилиши марҳумнинг кучли заҳар билан заҳарланганлиги аломатларини кўрсатди. Бу ҳақда Жанубий Корея ҳукуматидаги хабардор манба "Чосон ильбо" нашрига маълум қилди.

"Ким Чен Нам оғзида кўпик аниқланган, бу эса заҳар билан заҳарланганликнинг яққол аломати ҳисобланади", дейилган нашрда. Нашр маълумотларига кўра, "қотиллик учун ишлатилган заҳар, кўринишича, цианли натрийдан ҳам кучлироқ бўлган". 

Малайзия ҳуқуқ-тартибот муассасалари 14 февралда Ким Чен Намнинг вафотини тасдиқлашган. У Куала-Лумпур аэропортида ўзини ёмон ҳис қилиб, шифохона йўлида вафот этган. Полиция маълумотларига кўра, у кучли бош айланиши шикоятлари билан аэропортнинг ердаги хизматлари ходимларига мурожаат қилган ва номаълум аёл унинг юзига номаълум суюқлик пуркаганини айтган.

Малайзия полицияси қотилликка алоқадор бўлиши мумкин бўлган аёлни у Вьетнамга учиб кетмоқчи бўлганда қўлга олган. Баъзи маълумотларга кўра, Малайзия ҳуқуқ-тартибот муассасалари яна беш нафар гумонланувчини изламоқда. 

Ким Чен Нам Шимолий Корея етакчиси Ким Чен Ирнинг ўгай акаси бўлиб, Шимолий Кореянинг собиқ етакчиси Ким Чен Ирнинг тўнғич ўғлидир. 2001 йилдан бери хорижда, жумладан Макао, Малайзия ва Сингапурда яшаб келган.