«Катта йигирматалик» давлатлари ташқи ишлар вазирларининг икки кунлик саммитида иштирок этиш учун Швейцарияга келган АҚШ Давлат котиби Рекс Тиллерсонга меҳмонхонадан жой топилмади. Bloomberg хабарига кўра, шаҳардаги барча меҳмонхоналарда барча хоналар банд бўлгани учун Тиллерсонга жой берилмаган.

Шундан сўнг, уни Бонн шаҳридан 30 дақиқалик масофадаги санаторияга жойлаштиришган. 

Қайд этилишича, бу ҳолатга Тиллерсоннинг учрашувда иштирок этиши кечикиб тасдиқлангани сабаб бўлган. Шу туфайли, саммит вақтида Тиллерсон билан учрашмоқчи бўлган бошқа вазирлар, шу жумладан Буюк Британия Ташқи ишлар вазири Борис Жонсон санаториягача бўлган йўлни босиб ўтиш учун ортиқча 30 дақиқа йўқотган.

Шу куни Тиллерсон ва Россия ТИВ раҳбари Сергей Лавровнинг учрашуви вақтида залдан журналистларни чиқариб юборишганди. Америкалик сиёсатчининг фақат илк сўзларини эшитишган: «Салом. Раҳмат, мистер Лавров, мен ҳам сизни кўриб турганимдан мамнунман». Шундан сўнг америкаликлар делегацияси журналистларни «ҳайдаган». Улар ўз ҳаракатларини изоҳлашмаган.

Бу Тиллерсон ва Сергей Лавровнинг G20 ТИВ раҳбарлари саммити доирасидаги илк учрашуви эди. Лавров бу учрашув самарали ва фойдали кечганини маълум қилди.