Андижон спорти - Абдуллаевнинг издоши, сувга шўнғиб қадр топган йигитлар, бир эмас икки Руслан ҳайбати

Спорт 17 Февраль 2017 42746

Жорий йилнинг февраль ойида Kun.uz таҳририятининг ижодий жамоаси Ўзбекистон бўйлаб ўз сафарини бошлади. Дастлабки манзил Андижон вилояти бўлди. Ижодий жамоа у ерда бўлар экан, мустақилликдан сўнг ўз қиёфасини бутунлай ўзгартирган, замонавий кўриниш олган Андижоннинг спорти билан яқиндан танишди, одамлари билан дилдан суҳбат қурди.

Андижон спорти

Аввало, шуни таъкидлаш лозимки, Андижон деганда инсон кўз ўнгида спорт, тўғрироғи бокс гавдаланади. Муболағасиз айтса бўладики, бу бежизга эмас, чунки халқаро турнирлардан тортиб, то Олимпия чўққиларини забт этган забардаст спортчиларгача айнан мана шу заминда туғилиб, вояга етишган.

Дарҳақиқат, довруғи дунёга достон бўлган олимпия, жаҳон ва қитъа чемпионларини тарбиялаган Андижон олимпия заҳиралари коллежини том маънода – “Чемпионлар фабрикаси” деб аташ мумкин. Бокс бўйича илк бор Олимпия олтин медалини қўлга киритган ўзбек ўғлони Муҳаммадқодир Абдуллаев, оғир вазнда ҳаваскорлар ўртасида жаҳон чемпиони, WBA профессионал йўналиши олтин камар соврини соҳиби Руслан Чагаев, Афинада бўлиб ўтган олимпия ўйинлари бронза медали совриндорлари Баҳодир Султонов ва Ўткирбек Ҳайдаровлар, Рио олимпия ўйинлари қаҳрамони Ҳасанбой Дўстматов, паралимпия чемпионлари Фирдавс Мусабеков, Музаффар Турсунхўжаев... Эҳ-ҳе, бу даргоҳдан етишиб чиққан чемпионларни санаб адоғига етиш қийин.   

Спортнинг жуда кўп турлари бўйича мамлакатимиз терма жамоалари таркибини АОЗК талабалари ташкил этади. Бу ютуқлар замирида мураббий ва устозларнинг машаққатли меҳнатининг ўрни беқиёс. Чунки, муассасада жуда тажрибали мураббийлар жам бўлган.           

- Коллежимиз 2003 йил май ойида Ўзбекистон Республикасининг биринчи президенти Ислом Каримовнинг ташабуси ва раҳнамолигида бунёд этилган,- дейди муассаса директори, Ўзбекистонда хизмат кўрсатган мураббий Алишер Абдуллаев.  - Коллежимизда айни вақтда 600 нафар ўқувчи бўлиб, улардан умумтаълим бўғинида 300 нафари таълим тарбия олади. Спортнинг 29 тури бўйича эса мунтазам машғулотлар олиб борилади.      

Билим даргоҳида 48х108 ҳажмдаги универсал спорт манежи, 1 та ёпиқ ва яна бир очиқ сув ҳавзаси, бир нечта очиқ майдонча ҳамда 18000 ўринли барча талабларга жавоб берадиган “Соғлом авлод” ўйингоҳи мавжуд.

Универсал спорт аренаси ва сузиш ҳавзасида бўлиб, ёш спорчиларнинг чин юракдан ўзгача ғайрат-шижоат билан устозлар кўмагида спорт ҳадисларини ўрганаётганига гувоҳ бўлдик. 

- Бизда спортчиларнинг нафақат жисмонан бақувват, балки маънан етук этиб тарбиялашга катта эътибор берилади,- дейди коллеж директорининг маънавий-маърифий ишлар бўйича ўринбосари Фаррухбек Авулов. – 14 та ўқув умумтаълим фан кабинети, 10 та махсус фан кабинети ва 50 ўринли ахборот-ресурс маркази ўқувчилар хизматида.  

Осиё йўлбарси

Ўзбек боксининг ёрқин намоёндаларидан бири, 2000 йилги Сидней олимпиадаси ғолиби Муҳаммадқодир Абдуллаев ҳам Андижон фарзанди. Муҳаммадқодир 1973 йили туғилган. У 1997 йили Малайзиянинг Куала-Лумпур шаҳрида ўтказилган Осиё чемпионатини ғалаба билан якунлаб, 1998 йили Хитойнинг Чонг-Гинг шаҳрида ўтказилган Жаҳон Кубогида шоҳсупанинг энг юқори поғонасига кўтарилиб, ўша йилнинг ўзида, Бангкокда ўтказилган XIII Осиё ўйинларини ҳам олтин медаль билан якунлайди.

1999 йили АҚШнинг Хьюстон шаҳрида жаҳон чемпиони, деган шарафли номга сазовор бўлади. Шу йили Тошкентда ташкил қилинган Осиё чемпионатида яна бир карра энг кучли эканлигини исботлайди.

Қаҳрамонимиз, профессионал рингда ҳам юқори натижаларни қайд этган. Ҳозирда Абдуллаев катта спортдаги боксчилик карьерасига якун ясаган.

Бокс фахрийси, айни вақтда юртимизда спортни ривожлантиришга ўз ҳиссасини қўшиб келмоқда. Жумладан, 2013 йилдан бошлаб, Муҳаммадқодир Ўзбекистон Профессионал бокс федерацияси раисининг биринчи ўринбосари лавозимида фаолият юритиб келмоқда.

1999 ва 2000 йилларда Ўзбекистоннинг энг яхши спортчиси деб топилган Муҳаммадқодир Абдуллаев – “Эл-юрт ҳурмати” ордени, “Шуҳрат” медали, “Ўзбекистон Республикасида хизмат кўрсатган спортчи”, “Ўзбекистон ифтихори” фахрий унвонлари билан тақдирланган.

Kun.uz ижодий жамоаси Муҳаммадқодир Абдуллаев билан суҳбатда бўлди

Tas-IX`да кўриш

- Буларнинг бари, аввало, мустақиллик шарофатидан. Қолаверса, Биринчи Президентимиз Ислом Каримов томонидан спорт соҳасида амалга оширилган, олдиндан кўра билган ҳолда режалаштирилган ислоҳотларнинг меваси, - деди Муҳаммадқодир Абдуллев. - Ҳозир, нафақат Андижонда, балки республикасизнинг турли чеккаларида муҳташам спорт ареналари фаолият юритиб келмоқда. “Биз ҳеч кимдан кам эмасмиз ва кам бўлмаймиз ҳам”, деган шиор билан ёшлар ушбу спорт масканларида қатнашмоқда, машғулотлар ўтказишмоқда ва айтиш жоизки, бу меҳнатларнинг самараси беиз кетмаяпти. Биринчи Президентимиз сўнгги бор Андижонга ташриф буюрганларида, бу ерда бокс академиясини ташкил этишни режа қилган эдилар. У кишининг эзгу мақсадлари рўёбини амалга ошириш учун ҳаракатлар олиб бориляпти. 7-8 гектарли махсус майдон танланиб, шу ерда бокс академиясини барпо этиш режалаштирилган. Ана шунда бутун Ўзбекистон, балки жаҳондан бу ерга келишиб, бокс сирларини эгаллашга бўлган қизиқиш янада ортади.

Сузиш бўйича Олимпия чемпионлари

Андижонда спортнинг нафақат бокс ва оғир атлетика турлари, балки сузиш тури ҳам тезкорлик билан ривожланиб бормоқда. Бунга ёрқин далил сифатида 2016 йил Риода бўлиб ўтган Паралимпиада баҳсларида 100 метр масофага брасс усулда сузиш бўйича куч синашган Фирдавс Мусабеков 1 дақиқа 04.94 сония натижа кўрсатиб, олтин медални қўлга киритганини келтириш мумкин. Ёки бўлмаса айнан шу мусобақада эркаклар ўртасида 50 метрга эркин сузиш усулида Музаффар Турсунхўжаев 24,21 сониялик вақт билан маррага учинчи бўлиб етиб келгани ва Паралимпия бронза медалини қўлга киритганини мисол қилиш мумкин.

- Бизнинг ютуқларимизга 8 йил мобайнида ёнимизда бўлган ва сузиш сирларини мукаммал ўргатган устозимиз Абдуллаев Нодирбекнинг хизмати катта, - деди чемпионлар Kun.uz ижодий жамоаси билан ўтган суҳбатда. – Спортчида ғалабага ишонч бўлар экан, у 60 фоиз муваффақият қозонди дегани. Бу сирларни бизга мураббийимиз ўргатганлар. 8 йилдан буён ўқув-йиғин машғулотларида бир хил тартиб-қоидага амал қиламиз. Тартибнинг бўлиши ҳам муваффақият гаровидир. 

Бу ҳушчақчақ йигитлардан кейинги режалар ҳақида сўралганида, улар медаллар сонини янада ошириш, жаҳон, олимпия рекордларини ўрнатиш, юрт байроғини доимий баланд кўтариш ҳақида гапиришди.  

Шу ўринда эслатиб ўтамиз: яна бир андижонлик Олимпиада чемпиони, бокс бўйича олтин медаль соҳиби Ҳасанбой Дўстматов билан олиб борилган суҳбат сайт ўқувчиларига тақдим этилган эди. 

Сафар давом этади

Йўлингиз тушиб Андижонга келсангиз, агар сизда чин чемпионлар тарбияланаётган даргоҳни кўриш истаги туғилса, албатта, олимпия заҳиралар коллежига келинг. Сиз бу ерда Ватан довруғини кўкка ёйиш учун ҳаракат қилаётган орзулари осмон қадар спортчи ёшларни учратасиз. Насиб қилса, бу маскандан ҳали кўплаб чемпионлар етишиб чиқажак.

Kun.uz ижодий жамоаси Андижон бўйлаб ўз сафарини давом эттирди ва вилоятнинг Жалақудуқ туманига йўл олди. У ерда ўзгача мавзу, ўзгача манзара кутиб турар эди...

Кун янгиликлари
Фарғона вилояти ҳокими Сўх тумани, уй-жой муаммоси, табиий газ ва аҳолининг бошқа муаммолари ҳақида (видео)
20:30 / 21.08.2017 30857 Жамият
Artel Technical School «Келажак мактаби» ўқув нархларини пасайтирмоқда!
20:02 / 21.08.2017 16961 Жамият
Халқ таълими вазири билан очиқ суҳбат: янги вазирлик, 10-синф, пахта терими, коррупция ва йиғди-йиғдилар
23:29 / 20.08.2017 66689 Жамият
Ногиронлик ва мазлумлик исканжасида: бир аёл яхшилар саховатидан умидвор 
15:55 / 18.08.2017 57652 Жамият
Электр энергиясининг намунали истеъмолчилари рағбатлантирилади
Трамп АҚШ ҳукуматини ёпиш билан таҳдид қилди
10:50 3651 Жаҳон
Самарқанд вилоятида 6 миллион доллар қийматидаги трансформаторлар ишга туширилди
Трамп: Ким Чен Ин АҚШни ҳурмат қилишни бошлади
10:30 4444 Жаҳон
Шайхонтоҳур туманидаги қасддан одам ўлдириш фош этилди
10:27 3558 Жамият
Фарғонада ўқитувчиларни мажбурий меҳнатга жалб қилган халқ таълими мудираси ишдан олинди
Кўпроқ янгиликлар