Дунёдаги энг қари денгиз қуши деб эътироф этиладиган альбатрос туридаги қуш 66 ёшида навбатдаги маротаба насл кўрди, деб хабар бермоқда АҚШнинг овчилик ва балиқчилик масалалари бўйича бошқармаси.  

Бошқарма маълумотларига кўра, Уиздом (Донишмандлик) лақабли, юқори қисми қора рангли альбатрос қушининг урғочиси камида 66 ёшда. У 60 йилдан бери Тинч окенидаги Мидуэй маржон қояларига тухум қўйгани келади.

16 февралда қушнинг навбатдаги полапони тухумни ёриб чиқди. Биологларнинг ҳисоб-китобига кўра, рекордчи қуш ўз умри давомида 30 га яқин полапонни "тарбиялаган".

Мидуэй оролида бу турдаги альбатросларнинг дунёдаги популяциясининг 70 фоизи яшайди.