Афғонистоннинг Исломободдаги элчихонаси вакиллари Равалпинди шаҳридаги (пойтахт шаҳарнинг йўлдоши) армия қароргоҳига чақирилди. У ерда уларга норозилик билдирилди. Бу Афғонистон ҳудудидан Покистонга қарши террорчилик ҳужумларини ташкил этиш мақсадида фойдаланиш туфайли рўй берди, деб хабар қилди Покистон армиясининг матбуот хизмати раҳбари генерал-майор Асиф Ғофур.

Бундай қарорга келинишига Покистоннинг Синд вилоятидаги Сахвон шаҳрида жойлашган масжидда содир этилган теракт сабаб бўлди. Унинг оқибатида камида 74 киши ҳалок бўлди, 300 нафардан ортиқ инсон жароҳатланди.

Теракт рўй бергач, Покистон армияси штаби бошлиғи генерал Қамар Жавод Бажва Исломобод мамлакатда кузатилаётган терактларга жавоб қайтариш ниятида эканини маълум қилди. Покистон томони содир этилган теракт ташкилотчилари Афғонистон ҳудудидан ҳаракат қилишганини хабар қилган.

Афғон дипломатларига, шунингдек, Исломобод томонидан қидирувда бўлган 78 нафар террорчи рўйхати тақдим этилди. Улар Афғонистонда яширинишмоқда ҳамда Покистон Кобулдан уларни Исломободга дарҳол беришни ёки бу шахсларга нисбатан тегишли чоралар кўришни талаб қилди.

Покистон ҳукумати Афғонистон билан чегарадаги Торкхам назорат-ўтказиш пунктини хавфсизлик нуқтаи назаридан ёпиб қўйди.