Жанубий Кореянинг машҳур Galaxy смартфонларини ишлаб чиқарувчи компанияси Galaxy Note 7 фаблетлари билан юз берган ачинарли воқеалар янги флагман телефонлар билан ҳам такрорланишини хоҳламаётган кўринади. 

Яқинда Samsung компанияси Galaxy S8 ва S8 Edge смартфонлари учун Япониянинг Murata Manufacturing батареяларини етказиб бериш бўйича шартномани имзолагани ҳақида хабарлар пайдо бўлган эди. Эндиликда, корпорация батареяларни етказиб бериш бўйича қўшимча пудратчи сифатида Sony компаниясини танлаган, деб ёзмоқда The Wall Street Journal нашри ўз манбасига таянган ҳолда. 

Январь ойи охирида Samsung компанияси Galaxy Note 7 фаблетофонларининг портлаши ва ёниб кетишига доир тадқиқот натижаларини эълон қилган эди. Samsung муҳандислари ва мустақил экспертларнинг фикрича, телефонларнинг ёнишига аккумуляторларни лойиҳалашдаги нотўғри ҳисоб-китоблар ва қурилмаларни йиғишнинг технологик жараёнида йўл қўйилган хатолар сабаб бўлган.