Қирғизистон президенти Алмазбек Атамбоев Брюсселга ташрифи вақтида Euronews телеканалига берган интервьюсида унинг мамлакати қўшни давлатлар билан савдо қилиши зарурлигини айтди ва Евроосиё иқтисодий иттифоқи Россия манфаатларини ҳисобга олиши ҳақидаги фикрга изоҳ берди.     

Телеканал журналисти Атамбоевдан "Сиз бу иттифоқ кўпроқ Россия манфаатларини акс эттириши ва Лукашенко айтгандек, Беларусда юз бергандек, Қирғизистон ҳам нафсиз вазиятда қолиши мумкин, деб ҳисоблайсизми?" деб сўради.

Атамбоевнинг айтишича, "мамлакат кимдир билан савдо қилиши, қўшнилар билан ишлаши лозим". Унинг таъкидлашича, агар Қирғизистон ЕОИИга кирмаганда, республика блокадада қолиши мумкин эди.

"2010 йилда Қозоғистон бизга 1,5 ойлик блокада уюштирган, бизда ҳаттоки қурбонлар ҳам бўлган. Шундай бўлган, чунки блокада – ёмон нарса. Бизга қаергадир кириш учун муқобил ташкилот таклиф қила олишадими? Нима, Афғонистонгами? Илтимос, биз бугуноқ Европа Иттифоқига киришга тайёрмиз. Мен буни таклиф қилганман, бироқ менга бизда умумий чегаралар йўқлигини очиқчасига айтишган. Унда бизга нима таклиф қила оласиз? Бизда 6 млн киши бор. Яккаланиб, жунглилардек яшашимиз керакми? Биз ривожланишимиз керак, бизга бозор керак", деб айтган Атамбоев.  

Журналист Атамбоевнинг ЕОИИ биринчи навбатда Россия манфаатларини акс эттириши борасидаги фикрини сўради. 

"Мен билмайман, Балки Россия ёки унинг раҳбарлари шундай истагандирлар. Бироқ бугунда бу иттифоқ фойдалидир, мисол учун Қирғизистонга. Нимага? Мисол келтираман. Россияда бизнинг ярим миллионга яқин меҳнат муҳожирларимиз яшайди, бу инсонлар мустақиллик йилларида турли сабабларга кўра у ерга кўчиб кетганлар. Баъзилар у ерда 20-30 йилдан бери яшамоқдалар. ЕОИИга кирганимиздан кейин уларда жуда бўлмаса ҳуқуқлар пайдо бўлди. Аввал улар у ерда қуллардек бўлганлар. Энди эса уларда ҳуқуқлар мавжуд. Улар ишга кира оладилар", деб жавоб берди Қирғизистон президенти.