Жаҳон бокс серияси (WSB)нинг VII мавсум «C» гуруҳи 2-тури доирасида Қозоғистоннинг Astana Arlans жамоаси ўз уйида Ўзбекистоннинг Uzbek Tigers жамоасига қарши баҳс олиб борди.

Бешта жангдан иборат мусобақада қозоғистонлик боксчилар умумий ҳисобда 4:1 ҳисобида ғалаба қозонишди.

Аввалига 52кг.гача вазн тоифасида Аброржон Қодиров қозоғистонлик Ўлжас Саттибоевга имкониятни бой бериб қўйди. Беш раунд якунларига кўра, Саттибоев 3:0 ҳисобида ғалаба қозонди.

Иккинчи жангда 60кг.гача вазнда Закир Сафиуллин олимпиада ўйинлари совриндори Муроджон Аҳмадалиевни мағлуб этди — 3:0. Учинчи жангда яна бир олимпиада ўйинлари совриндори Шаҳрам Ғиёсов 69кг.гача вазн тоифасида Асланбек Шимбергеновга қарши рингга кўтарилди. Дастлабки икки раунди ўз фойдасига ҳал қилган Шаҳрам кейинги раундларни бўш ўтказди ва якунда 2:1 ҳисобида имкониятни бой берди.

81кг.гача вазнда эса Бектемир Мелиқўзиев Нурдаулет Жармановга ҳеч қандай имконият қолдирмасдан ғалаба қозонди — 3:0. Бироқ +91кг вазнда рингга чиққан Баҳодир Жалолов Камишбек Кункабаевга имкониятни бой бериб қўйди. Якуний ҳисоб 4:1, Astana Arlans фойдасига.