Россия пойтахтида МДҲ мамлакатларидан келган меҳнат муҳожирларига иш ҳақи тўланмаганлиги бўйича жиноий иш қўзғатилди. Москва прокуратураси сайтида хабар қилинишича, 250 нафардан ортиқ ишчига иш ҳақи тўланмай келингани аниқланган. 

Маълумотларга кўра, прокуратурага «Горизонт» МЧЖ устидан иш ҳақини тўламаётгани ҳақида 250дан ортиқ мурожаат келиб тушган. Улар орасида Ўзбекистон, Тожикистон, Қирғизистон ва бошқа мамлакатлар фуқаролари бор. Корхона уларни меҳнат шартномаси тузмасдан ёллаб ишлатган. 

Прокурорлик текшируви натижасида аниқланишича, муҳожирлар меҳнат қилгани, аммо уларга иш ҳақи тўланмаганини тасдиқловчи етарли далиллар тўпланган. 

2016 йил августидан 2017 йил февралига қадар қарздорлик 10 млн рублни ташкил этган. 

Хабарларга кўра, «Горизонт» МЧЖга нисбатан аввал ҳам прокурорлик текшируви ўтказилган. Корхона меҳнат шартномаси тузган ишчиларига ҳам иш ҳақи тўламаган. Бу борадаги қарздорлик 8,8 млн рублни ташкил этади, дея аниқлик киритган Москва шаҳар прокуратурасида.