2017 йил 17 февраль куни Ўзбекистон Республикаси Президенти Шавкат Мирзиёевнинг Фанлар академияси фаолияти, илмий-тадқиқот ишларини ташкил этиш, бошқариш ва молиялаштиришни янада такомиллаштириш чора-тадбирлари тўғрисида қарори қабул қилинди.

Қарорга мувофиқ, Ўзбекистон Республикаси Молия вазирлиги, Иқтисодиёт вазирлиги ва Фанлар академиясининг илмий тадқиқотлар якуни бўйича салмоқли натижаларга эришган олимларни тақдирлаш бўйича таклифлар ҳам тасдиқланди. 

Эндиликда етакчи олимларни тақдирлаш ва эътироф этиш учун Фанлар академиясининг илмий ходимларни моддий рағбатлантириш жамғармаси ташкил этилади.

Маълум бўлишича, Фанлар академиясининг илмий ходимларни моддий рағбатлантириш жамғармаси Фанлар академияси илмий-тадқиқот муассасаларининг хўжалик ва тадбиркорлик фаолиятидан тушган соф фойданинг 10 фоизи миқдоридаги чегирма ҳисобидан шакллантирилади. 

Шунингдек, юртимиздаги ёш олимларнинг етакчи хорижий илмий марказларда қисқа муддатли стажировкалари ҳам молиялаштирилади. 

Мазкур қарорлар юртимизда фаолият олиб бораётган олимларнинг самарали меҳнатларини муносиб баҳолашда ва уларни моддий томонлама рағбатлантиришда ўз ҳиссасини қўшади.