Тожикистон таълим вазирлиги мамлакатдаги ўрта таълим мактабларида рус ва инглиз тилларини ўқитиш учун ажратиладиган соатларни кўпайтириш масаласи устида ишламоқда. Бу ҳақда Тожикистон педагогика фанлари академияси вице-президенти Ирина Каримова маълум қилди. 

"Ҳозирда таълим ва фан вазирлиги ишчи комиссияси рус тилини мактабларда ўқитишни неча соатга ошириш мумкинлиги борасида ишламоқда", деб айтди мутахассис. Унинг айтишича, вазирлик мамлакат президенти Эмомали Раҳмоннинг рус тилини ўқитиш соатларини ошириш борасидаги кўрсатмасига кўра иш тутмоқда.

"Бу комиссия қайси захиралар ёки дарслар ҳисобига рус тили соатларини ошириш мумкинлигини ҳал қилади, ҳозир рус тили ҳафтасига 3 соатдан ўқитилади", деб айтди Каримова. Рус тили Тожикистон конституциясида миллатлараро мулоқот тили сифатида бириктирилган ҳамда 2-синфдан бошлаб мактабларда мажбурий ўқитиладиган фан ҳисобланади.  

Мутахассиснинг айтишича, ҳозирда мактабларда рус тилига ўқитишдаги асосий муаммо юқори малакали педагогик кадрлар ва рус тилида дарс олиб борувчи ўқитувчиларни қайта тайёрлаш курсларининг йўқлиги ҳисобланади.